أزعل عليك أحيان وأحيان أراضيك

البُعد روحي عنكَ ما تستطيعه

تامر على روحي وقلبي وأنا أفديك

عهد علي والله ملزوم أطيعه

يا كامل بالزين والحسن حاويك

تمشي ما بين الناس راسك رفيعة

أرتاح وأنعم دام همسي يناجيك

العمر يفنى والليالي سريعة

إنت الأمل في دنيتي يوم أراعيك

وإنت الحياة ونور كل الوسيعة

أحسب على قولك وخطوة مماشيك

اللي يودك أنصحك لا تبيعه

هيا تعال وضُمني بين أياديك

خل العناد وخل عنك القطيعة

بُعدك تراني بين طيفك وطاريك

والحال من غيرك تراها وجيعة

اسمع لحون اللي يحبك ويغليك

يرسم بإحساسه قوافي بديعة

يوم اللقا كل المشاعر تحيّيك

من قلب صافي ما يعرف الخديعة

يا مرحبا يا هلا يا غلا فيك

يا عطر قلبي يا زهرته يا ربيعه